Hunayn ibn Ishaq
Hunayn ibn Ishaq (vèrs 808, Al-Hira - octòbre de 873, Bagdad) es un mètge e traductor siriac dau sègle IX. Figura centrala de l'Edat d'Aur intellectuau dau Califat Abbassida, s'impausèt coma lo pus important traductor dei tèxtes antics grècs vèrs l'arabi e lo siriac.
Crestian nestorian, s'installèt a Bagdad onte creèt una mena d'entrepresa privada de traduccion associada ai trabalhs de l'Ostau de la Saviesa. Mestrejant lo grèc, lo siriac e l'arabi, desvolopèt un metòde rigorós basat sus l'estudi dei manuscrits, comprenença dau sens originau avans la traduccion e adaptacion dau vocabulari tecnic. Hunayn ibn Ishaq traduguèt ansin Galen e Ipocrates e aguèt un ròtle major dins la difusion e dins l'estabilizacion dei sabers grècs dins lo monde islamic. Venguèt tanben mètge dau califa Al-Mutawakkil (847-861).
Son òbra medicau èra probable compausat d'un centenau d'obratges. La mitat es estada conservada. Son trabalh permetèt de definir una basa terminologica duradissa que facilitèt lo desvolopament de la medecina aràbia. En mai de Galen e d'Ipocrates, foguèt l'autor de traduccions de tèxtes d'Aristòtel e de Platon.
